Дар кишвари Красноярск ҳамасола дар ибтидои фасли тобистон таҷлили ҷашни миллии тоҷикон «Сайри лола» ба ҳукми анъана даромадааст. 27 июни соли ҷорӣ, бо ташаббуси Ҷамъияти тоҷикони кишвари Красноярск ва дастгирии роҳбарияти кишвари мазкур, чорабиниҳои идона дар ҷазираи Татышеви шаҳри Красноярск доир гардид, ки ба 15 –умин солгарди Рӯзи ваҳдати миллӣ дар Тоҷикистон бахшида шуд. Бояд қайд кард, ки ҳар сол дар ин чорабинии идона теъдоди зиёди муҳоҷирони меҳнатии тоҷик, аҳолии маҳаллӣ, меҳмонони даъватшуда, роҳбарияти шаҳру кишвар ҷамъ меоянд.

Намояндаи ҶСК «Агроинвестбонк» Ҳайдар Олимов барои доир намудани ин чорабинӣ саҳми беандоза калон дорад. Соли ҷорӣ дар ин чорабинии идона Рафиков Рашид Гиззатович – ҷонишини сардори Идораи робитаҳо бо ҷомеаи маъмурияти кишвари Красноярск, Тсокаев Рамзан Дадишевич – сардори шӯъба оид ба миллатҳо ва дини Идораи робитаҳо бо ҷомеаи маъмурияти кишвари Красноярск, Коновалова Елена Василевна – мушовири шӯъбаи технологияҳои нав ва муносибатҳои мутақобила бо иттиҳодияҳои ҷамъиятии департаменти сиёсати иҷтимоии маъмурияти шаҳри Красноярск, Храмов Геннадий Иванович – раиси палатаи ҷамъиятии миллатҳои Маҷмааи шаҳрвандии кишвари Красноярск ва дигар шахсони расмӣ, меҳмонони даъватшуда ширкат варзида ҷамъомадагонро табрик гуфтанд.

Аз номи Губернатори кишвари Красноярск барқияи табрикиро бахшида ба 15 –умин солгарди Рӯзи ваҳдати миллӣ дар Тоҷикистон, инчунин иди «Сайри лола» ҷонишини сардори Идораи робитаҳо бо ҷомеаи маъмурияти кишвари Красноярск Рафиков Рашид Гиззатович ва аз номи мири шаҳри Красноярск мушовири шӯъбаи технологияҳои нав ва муносибатҳои мутақобила бо иттиҳодияҳои ҷамъиятии мудирияти сиёсати иҷтимоии маъмурияти шаҳри Красноярск қироат намуданд.

Боиси тазаккур аст, ки ба ин чорабинӣ баромади коллективҳои эҷодӣ ва мусобиқаҳои варзишӣ, ки бо ташаббуси ташкилкунандагони он доир шуданд, шукуҳу шаҳомати хос зам намуданд. Ба маблағҳои ба сифати сарпараст ҷудо намудаи ҶСК «Агроинвестбонк» бошад, туҳфаҳои гуногун харидорӣ шуда ба ғолибони мусобиқаҳои варзишӣ тақдим гаштанд. Иди имсолаи «Сайри лола» солҳои зиёд дар хотираи сокинон ва меҳмонони шаҳри Красноярск нақш хоҳад гузошт.